Маъюбон
Маъюбон
Лоиҳаи «Маъюбон» — иқдоми хайриявӣ барои дастгирии шахсони дорои маъюбият аз оилаҳои ниёзманд ва осебпазир, ки дар шароити бисёр душвор зиндагӣ мекунанд. Мо кӯшиш менамоем шахсони воқеан ниёзмандро муайян карда, бо маблағҳои ба мо боваршуда барои беҳтар намудани шароити зиндагӣ, пайдо кардани имконияти кор ва таъмини рӯзии ҳалол дастгирӣ намоем.
Дар бораи лоиҳа
Ҳадафи лоиҳа дастгирии шахсони дорои маъюбиятест, ки бинобар вазъи ҷисмонӣ, шароити вазнини оилавӣ ва камбизоатӣ аз имкониятҳои зарурии зиндагии шоиста маҳруманд.
Мо бовар дорем, ки маъюбият набояд инсонро аз имконияти зиндагии боиззат ва меҳнати ҳалол маҳрум созад. Аз ин рӯ, кӯшиш мекунем кӯмакҳои ҷамъовардашударо ба нафарони воқеан арзанда ва ниёзманд расонида, ба онҳо танҳо кӯмаки яквақта не, балки имконияти мустақил шудан ва ба даст овардани рӯзии ҳалол фароҳам созем.
Кӯмак вобаста ба ниёзи ҳар як шахс метавонад барои табобат ва воситаҳои зарурӣ, беҳтар намудани шароити зиндагӣ, омӯзиши касб, хариди таҷҳизот ё ташкили кори хурд равона гардад.
Мақсади мо ин аст, ки шахси дорои маъюбият танҳо қабулкунандаи кӯмак набошад, балки то ҳадди имкон имкони кор кардан, даромади ҳалол ба даст овардан ва бо шаъну шараф зиндагӣ кардан дошта бошад.
Мо инчунин бовар дорем, ки ҳар як инсон, новобаста аз маҳдудиятҳои ҷисмонӣ, дорои қадру манзалат ва истеъдодҳои хоси худ мебошад.
Яъне:
Маъюбият маҳдудияти инсон аст, на маҳдудияти умед. Мо кӯмак намекунем, то танҳо имрӯзро гузаронанд — кӯмак мекунем, то фардои худро созанд.
Тарзи кор
Аз ниёз то ҳисобот
Ҳар як лоиҳа аз чор марҳилаи возеҳ мегузарад — то шумо бидонед, ки маблағи шумо ба куҷо мерасад.
- 01
Шинохти ниёз
Тавассути имомони маҳаллӣ, шарикон ва аризаҳо мушкилиро мушаххас мекунем.
- 02
Санҷиш ва арзёбӣ
Ба маҳал ташриф меорем, ҳолатро аз наздик мебинем ва арзёбӣ мекунем.
- 03
Иҷро бо шарикони маҳаллӣ
Кор дар ҳамкорӣ бо мутахассисон ва ихтиёриёни маҳаллӣ анҷом мешавад.
- 04
Ҳисобот ба хайрхоҳон
Аксҳо, ҳуҷҷатҳо ва натиҷаро дар ҳисоботи ин лоиҳа мубодила мекунем.
Таъсир
100% ба лоиҳа мерасад
Ҳар сомонии шумо мустақим ба ҳамин лоиҳа равона мешавад. Хароҷоти маъмурӣ пурра аз ҷониби шарикони ширкатӣ пӯшонида мешавад.